自足利尊氏推舉北朝「持明院統」既天皇，創建室町幕府，到足利義滿統一南北朝起，武士再度掌握日本大權，地方由管領、守護負責統治，將軍在中央監督各地，創建出一系列既地方守護體制。日本統一經歷五十幾年後，室町幕府進入第八代將軍 - 足利義政既統治時代。
足利義政於1449年就任將軍，新官上任總有一番抱負，義政決定恢復足利義滿時代既政策，積極干涉關東一帶既紛爭，然而室町幕府實權掌握在管領細川家、畠山家、斯波家手上，甚至正室日野富子既家族都參與其中，呢個新任將軍意識到自己只係光棍司令，後來就沉迷酒色之中，任由外面各地守護奪權。
1464年，29歲既足利義政無權又無子，就更加心灰意冷，向全體家臣公佈：「我唔做將軍了！」於是請出家既弟弟 - 足利義尋還俗，改名足利義視並拜足利義政做養父，成為第一繼任人。點知一年之後，一直生唔出仔既日野富子竟然誕下男嬰 - 足利義尚，做阿媽梗係想個仔繼位，於是親近山名宗全一派，以確保義尚得到繼承權。
本以為食硬，點知殺出個程咬金，足利義視當然擔心，此時幕府管領家族 - 細川勝元出面支持，呢場繼承人爭奪戰遂演變成細川、山名兩家暗鬥。不過由於雙方各有通婚、關係匪淺，所以冇擴大爭亂，更曾經合作過。例如響1454年趁管領畠山家內亂時，兩家聯手支持畠田彌三郎、畠山政長，不過因為正統繼承人畠山義就回歸，迫退彌三郎成為家督而告吹，之後由細川勝元與畠山義就正面衝突，令對方失去家督位置，由兄弟畠山政長繼任，在此不說。
1466年7月，前斯波家家督繼承人 - 斯波義敏前往京都，親近足利義政側近，掌握政權既伊勢貞親、季瓊真蘂，斯波義敏過去因為與守護代甲斐常治、朝倉孝景對立，在越前爆發戰事，將甲斐一家殲滅，結果觸怒足利義政而被廢黜，改由其子松王丸繼任家督，兩年後又被罷黜，於是由涉川家出身既斯波義廉繼位，但係斯波義廉同山名宗全係親戚關係，呢次人事調動擴大山名家勢力。
足利義政為人較反覆無常、朝令夕改，突然宣佈義敏擔任家督，無端被炒魷既斯波義廉當然不服，就向山名宗全、一色義直、土岐成賴求助，最終義廉都係乖乖地讓出越前、尾張、遠江三國守護職位。
然而，事件並未就此落幕，9月5日伊勢貞親誣衊足利義視企圖謀反，義視向細川勝元求救，細川、山名兩家再度攜手為義視澄清，最終足利義政放逐伊勢貞親，斯波義敏失勢，家督位置又回歸到斯波義廉手上。
與此同時，室町武家名門 - 畠山家亦發生爭權鬧劇，身在大和既畠山義就突然上京，獲得山名宗全、斯波義廉支持。1467年正月，山名宗全響將軍府大排筵席，畠山義就獲邀請上席，意味著幕府承認義就做家督，索性要求畠山政長讓出府邸退位，政長又係不服被無理炒魷，今次佢向細川家求救，細川勝元先發制人奪取將軍府 - 花之御所，請足利義政發出「畠山義就討伐令」。不過千算萬算，卻算不出義政正室 - 日野富子竟然向山名宗全告密。
「蠢材，我想阿仔繼位，才搵山名宗全幫忙，告密又幾出奇？」
結果山名宗全扭轉形勢，集結同盟家族包圍將軍府，要求放逐細川勝元、畠山政長，將軍足利義政心慌了，但佢冇放逐細川，只係落左一道命令：「畠山家既事，由佢地私了，自己到上御靈神社解決，其他人唔準插手！」
畠山政長、義就異口同聲地說：「唔黎正契弟呀！」
1467年1月18日，畠山政長先到上御靈神社放火佈陣，畠山義就送天皇、公家帶到將軍府一帶避難，再與畠山政長決戰。不過義就知道將軍命令形同虛設，就請山名宗全幫手，派斯波義廉、山名政豐、朝倉孝景到場支援，而細川勝元遵從命令，冇派人支援，結果單挑變成山名派單方面群毆，畠山政長慘敗撤退，藏匿到細川家中，山名派控制將軍府一帶，代表室町幕府中樞已落入山名家之手。
細川勝元大權旁落，梗係想捲土重來，於是集合旗下勢力殺向京都，山名宗全亦召集所屬派系出擊，通稱細川勝元為「東軍」、山名宗全為「西軍」，十幾二十萬人敘首京都大混戰，呢場戰亂更席捲除關東、東北、甲斐、越後以外既日本全土，混亂程度遠超過去既「保元平治之亂」，室町幕府、京都自此捲入一場大混亂之中，由於當時年號為「應仁」，所以又稱為「應仁之亂」。
話說足利義政、足利義視初期都支持細川勝元，東軍確實利用家族長期建立既關係，鞏固近畿一帶，初期佔盡優勢。然而好景不常，1467年5月足利義政邀請伊勢貞親回歸，呢個政敵一返黎又追住足利義視篤灰，義視唯有嘗試去討伐西軍立功，挽回一點名聲，但點知西軍大內輝弘入京，令佢無功而還，加上無論佢點努力都好，足利義政都偏好親生仔，毫無立足之地既佢，唯有「離家出走」到伊勢北畠家休養。
但係我地既焦點，並唔係呢場「應仁之亂」，而係根住落黎既呢位人兄。「應仁之亂」爆發後，駿河守護今川義忠上洛表態支持東軍，期間與重臣 - 伊勢貞親會面，並由備中城主 - 伊勢盛定接待，今川義忠為親近伊勢家，就迎娶盛定之女 - 北川殿，自此伊勢、今川兩家建立關係。
響足利義視逃亡伊勢時，當時身為「引見人」，即係負責穿針引線既「主角」眼見足利義視失墜，而京都一帶又陷入混亂，為明哲保身，就自行請辭到駿河隱居，今川義忠亦有稍為接待。
九年後，1476年今川義忠在遠江作戰時，被當地一揆襲擊，身中亂箭而亡。今川家頓失家主，繼承人龍王丸仲係細路，根本無法管治，所以家臣三浦氏、朝比奈氏推舉較年長、與今川同族既小鹿範滿繼任，駿河名門 - 今川家亦陷入繼承人爭奪戰。
呢個時候，北川殿決定向隱居之身、時年44歲既「主角」求救，我地既「主角」眼見外甥年幼，覺得出手支持亦無妨，當賣個人情俾今川家，於是挺身而出。
「伊勢新九郎盛時，今日將為親愛既外甥，挺身解決今川家既煩惱。」
次回
淺談關東局勢
介入駿河 伊勢盛時初露鋒芒
關東名將 太田道灌
